Beranda
Anggun Bainai
Budaya Minangkabau

Naskah Randai Maelo Rambuik Dalam Tapuang – Kisah Anggun Bainai dalam Tradisi Minangkabau

Naskah Randai Maelo Rambuik Dalam Tapuang – Kisah Anggun Bainai dalam Tradisi Minangkabau

MAELO RAMBUIK DALAM TAPUANG

Oleh Jamaluddin Umar Rajo Kuaso

PARA TOKOH

1. ANGGUN BAINAI, 20 TAHUN, PATUH TAPI TEGAS, BERPENDIRIAN
2. SUTAN NAGARI, KEKASIH ANGGUN BAINAI 23 TAHUN. BERWIBAWA
3. LEMBANG ALAM, KEMENAKAN DT PALIMO KAYO 23 TAHUN. PAREWA
4. DATUK PALIMO KAYO, AYAH ANGGUN BAINAI 50 TAHUN, KONVENSIONAL
5. DATUAK RAJO MUDO, 47 TAHUN, MAMAK ANGGUN BAINAI, KHARISMATIK
6. PANDEKA SATI, 24 TAHUN. DUBALANG KAMPUNG BERANI BERPENDIRIAN
7. PANDEKA PANYARIANG AWAN, KEWAN PANDEKA SATI, TIDAK BERPENDIRIAN
8. KAMBANG SUASO, MANDEH ANGGUN BAINAI. PENYAYANG

Legaran 1

KEJADIAN DI ATAS RUMAH GADANG DATUK PALIMO KAYO BERBINCANG-BINCANG DENGAN RAJO MUDO MEMBICARAKA TENTANG MASALAH JODOH ANGGUN BAINAI

1/1 Datuk Palimo Kayo

Manolah tuan rajo mudo Mamak kanduang anggun bainai Tuan kamari lah sakutiko Raik takanduang ka ambo usai

1/1 Datuk Rajo Mudo

Manolah datuak palimo kayo Ayah kanduang anggun bainai Apo ko sabab karanonyo Raik takanduang kadiusai Pihak kabadan diri abo Lah lamo indak ka kampuang Mandanga imbau datuak cako Nan bak paneh tak balinduang Bacampua arok jo cameh Bakinco ragu jo takuik Nanang rasonyo paratian Arok dek mujua nan kadatang Cameh kok adoh baban barek Takuik dek musuah nan maintain Dek datuak barilah tarang Buliah nak sanang dalam hati Sajuak di dalam kiro-kiro

1/2 Datuk Palimo Kayo

Manolah tuan rajo mudo Mangkonyo tuan ambo himbau Naiak ka rumah tango kito Bukanyo adoh baban barek Atau kok musuah nan maintai Aluran badan anak ambo Banamo anggun bainai Nyato kamanakan dek tuan Lah ambo etoang-etoang hari Lah dibilang-bilang bulan Lah cukuik babilang taun Ukua lah tibo dijangkonyo Ibaraik manuga kacang panjang Lah tumbuah tigo halai daun Patuik dibari bajunjuangan Kok lai dapek pintak jo pinto Ka junjuangan diri anggun bainai Iyo lah bako inyo bana Bagala sutan lembang alam
DATUAK PALIMO KAYO MEMANGGIL ANAKNYA SERAYA MENGHADAP KE ARAH ANGGUN BAINAI

1/1 Anggun Bainai

Ampun lah ayah kanduang ambo Bari maaf jaweklah tangan Dek imbau ayah sakaliko Tagamang ambo mandangakan Manolah mamak rajo mudo Gawa jo kilaf tolang maafi Apo ko sabab karanonyo Ambo di imbau ayah kini

Legaran 2

ANGGUN BAINAI PERGI MENEMUI KEKASIHNYA YANG BERNAMA SUTAN NAGARI UNTUK MEMBICARAKAN PERMINTAAN AYAHNYA TERHADAP DIRINYA. SEKALIGUS MEMBICARAKAN TENTANG BAGAIMANA DENGAN KELANJUTAN HUBUNGAN MEREKA

2/1 Sutan Nagari

Diak kanduang Anggun Bainai Pamenan mato dek bundonyo Bantuak sarupo dagang sansai Apo ko sabab karanonyo

2/1 Anggun Bainai

Pandai bana tuan bapapatah Raso kaputuih rangkaian hati Hati di dalam sadang suasah Itu sababnyo datang kamari Danga dek tuan baritonyo Hati di dalam mangko dandam Pihak dek ayah kanduang ambo Nak maabiak si lembang alam Nan bak papatah jo ibaraik Gurindam caro urang minang Rang darek barumah sudah Baukie janjang tanggonyo Janji arek karanglah sudah Kamukie juo malah kironyo

2/2 Sutan Nagari

Anggun bainai gadih nan bijak Anak datuak palimo kayo Kato sasuai kok di bukak Kaba-a pulo kato ambo Pihak kabadan diri ambo Nan bak pantun urang juo Bagabun asok dari mudiek Urang mambaka rotan piladeh Abu taserak-serak juo Ambo sapantun talua iatiak Ibo ayam mangko manateh Kok indak busuak disarangnyo Nak duo pantun sairiang Danga dek adiak sabuah lai
Barisuak hari k asalasa Urang ka-kadai limau puruik Talatak kadai rang pariaman Sabalah kadai rang kurai taji Sampan balabuah disubarang Sampan balabuah duo tigo Marapek tantang pulau pandan Balabuah sadang tangah hari Isuak adiak kok manyasa Elok kini diganjua suruik Ilang rono bakocak roman Randah banso sabab dek kami Adiak ameh intan bakarang Denai ko loyang kanso timbago Kasiah kok rumik manaruihkan Elok diurak kini kini

2/3 Anggun Bainai

Manyasa denai bakato Nan indak-indak tuan sabuik Tuan kanduang sutan nagari Kabek sakali buhua sentak Wakatu tuan amuah bajanji Lah kaiyo tuan mailak Padi sakaruang tak bajaik Talatak dirumah gadang Nan punyo anak parambahan Den cabuik pisau sirawik Darah taserak nyao hilang Baitu kasanang hati tuan
ANGGUN BAINAI MECABUT PISAU SIRAWIT NAMUN CEPAT DITANGKAP OLEH SUTAN NAGARI

2/3 Sutan Nagari

Nambek sirawik adiak cabuik Turunkan darah didado Hati bimbang pikiran kusuik Mandanga curito adiak cako Diak kanduang anggun binai Saruangkan sirawi iko baliak Mangko bait kato denai Untuak pauji iman adiak

2/4 Anggun Binai

Tuan kanduang sutan nagari Danga dek tuan pantun denai Ayam kuriak rambaian tadung Ikua manjelo masuak padi Ambiak tampuruang barilah makan Dalam daerah tujuh kampuang Tuan surang tambatan hati Nan indah diulah den haramkan Nak duo kato sairiang Danga dek tuan sabuah lai Mangilek mangalimantang Mangguruah mamatiuh tongga Mamakiaak lawik sailan Manginjo kak batullah Bakinco luluak jo karang Bangun narako katujuahnyo Haram den ganti jo nan lain Alah katarang tu dek tuan

2/4 Sutan Nagari

Jikok itu kato bainai Dek denai batu pulo Anak balam dia teh tunggua Den tambak kanai dadonyo Di baliek batang nalo-nali Jatuah maraok masuak banda Samalam maik dalam kubua Datang malaikaik nan batanyo Ja-an kan jawab katabari Aggun surang nan takana Nak duo pantun sairiang Bialah darah nak tumpah Bialah baju nak nyo cabiak Tatagak mejan nan duo Basatieh denai pado allah Basilang tombak di lihie Baliak batimba baji makan Tangan suok pambimbiang adiak Tangan kida palawan musuah Bia nak carai nyo jo badan Anggun nan haram den lupakan

2/5 Anggun Bainai

Jikok baitu kato tuan Lah samo sanang dalam hati Bari maaf wakalah tangan Ambo kapulang kini-kini

Legaran 3

DIATAS RUMAH GADANG ANGGUN BAINAI MENUMUI AYAHNYA UNTUK MEMBERIKAN JAWABAN ATAS PERMINTAAN AYAHNYA TENANG PERJODOHAN DIRINYA DENGAN KEMENAKAN AYAHNYA, YANG BERNAMA SUTIAN LEBANG ALAM.

3/1 Anggun Bainai

Ampunlah ayah kanduang ambo Gawa jo kilaf tolong maaf Lah tibo maso kutikonyo Ambo bajanji tigo hari

3/1 Datuk Palimo Kayo

Anggun bainai gadih nan bijak Bijak sialah maajari Batin tasimpan elok dibukak Buliah nak sanang dalam hati

3/2 Anggun Bainai

Ayah kanduang janyo ambo Kok hanyo sutan lembang alam yah Alah dipikia-pikia bana Alah dihinoh dimanuangkan

3/2 Datuk Palimo Kayo

Nak kanduang aggun bainai Takuik nak karano salah Barani karano bana Kato takuik kato tak sampai Kato barani manyalasaikan Elok lah anak bari tarang Anggun bainai runggo hati Baa diri lembang alam nak Apo cacek binasonyo Atau kok buruk kurang roman Dek anak tarangkan bana Nak lapeh pilin dihati Nak hilang sangketo badan Dek gadih katokan bana

3/3 Anggun Bainai

Ayah kanduang balahan badan Kok hanyo sutan lembang alam yah Indak tacinto dalam hati Haram tabayang dek ilimu Sajak ketek bamanjo diri Lah gadang tarubah tidak Rinting bajudi tiok hari Lah habih hari dek basionjak Elok dek ameh rang basalang Licin dek minyak rang bamintak Badan sapantun alang-alang Kok tak ameh badan talatak Pahamuyo sapinteh lalu Lah rumiak ambo manyabuik Sarupo bana jo anjalu Santun limau mangkonyo hiduik
DATUK PALIMO KAYO MARAH, KARENA ANAKNYA MENOLAK PERMINTAANNYA DITAMBAH LAGI PENGHINAAN TERHADAP KEMENAKANNYA

3/3 Datuk Palimo Kayo

Anak malang anak cilako Sajak ketek den gadangkan Mulo sajiangko dari tanah Bukik tinggi lah den daki Lurah dalam lah den turuni Indak basiang jo bamalam Manggadangkan badan diri kau Guno jo kau baleh Bapatah batu malah kito Bakarek rotan malah kini Mulai hari kini nangko Kasiah putuih sayang lah sudah Den indak baranak lai Tingga lah kau jo mande kau Aden kapulang lah dahulu

3/1 Kambang Suaso

Nambek daulu tuan berang Nanti daulu tuan bajalan Ulah dek gabak tangah hari Paneh satahun tuan lupo

3/5 Datuk Palimo Kayo

Banto lah sudah den bantokan Bapantang balimau puruik Kato lah sudah den katokan Pantang denai babaliak suruik

3/4 Anggun Bainai

Ayaaaaaah.......
ANGGUN BAINAI MENGEJAR AYAHNYA DAN JATUH TERSIMPUI, SEMENTARA DATUK PALIMO KAYO TETAP MENERUSKAN LANGKAHNYA MENUJU KAMPUNG KEDIAMAN SUKUNNYA, SEMENTARA ANGGUN BAINAI TETAP DUDUK MENANGIS, MERATAPI NASIBNYA
Indak den sangko sirigo-rigo Pipik sinanduang makan padi Indak disangko ka coiko Sadang sayang ayah lah lari
KAMBANG SUASO KEMUDIAN MEMAPAH ANGGUN BAINAI DAN MEMBAWANYA BERDIRI

3/2 Kambang Suaso

Nak kanduang anggun bainai Pamenan mato ayah bundo Usah anak manangih juo Kalau ayah sadang berang Tandonyo sayang nyo ka kito

Legaran 4

ANGGUN BAINAI MASIH MENANGIS DI ATAS ANJUNGAN RUMAH GADANG, SETELAH KEPERGIAN AYAHNYA, PADA SAAT ITU DATANG DATUK RAJO MUDO, YANG PULANG DARI SURAU, KEMUDIAN DATUK RAJO MUDO MENGHAMPIRI ANGGUN BAINAI, UNTUK MENGHIBURNYA

4/1 Datuk Rajo Mudo

Anggun bainai gadih nan bijak Pawarih adaik jo pusako Agak kamari upiak tagak Usahlah upiak manangih juo

4/1 Anggun Bainai

ampuni ambo mamak kanduang bari maaf jawek lah tangan hati rusuh pikiran bimbang dek ayah lapeh dari pangkuan

4/2 Datuk Rajo Mudo

Anggun bainai gadih pusako Hati nan usah diparusauh Paham nan usah dipacewang Kok lapeh dari pangkuan ayah Mamak kan lai kamambimbiang Pihak kabadan ayah upiak Dek tilak pandangan mamak Kudo balari buliah diburu Tampak kadalam tanggua jalo Kok lah habih tenggang jo kalaka Dirunuik sahabih paham Tak dapek untuang dikaja Kok tak sarato jo bagian Kini baitu malah dek upiak Bari mamak kato sungguah Elok nan bana dikatokan Walau kalangik mamak sigai Mikie kalawik mamak narangi Sabalun dapek kandak upiak Hati mamak kasanang balun
KEMUDIAN DATANG KAMBANG SUASO MASUK KE RUANGAN.

4/1 Kambang Suaso

Nak kanduang anggun bainai Sarato kakak kanduang ambo Lah lamo raso dek baandai Hari baransua patang juo Ooo nak kanduang nan rancak manih Kini baitu lah dek anak Gadih kadapua lah dahulu Sadiokan minum jo makan Nyato mamak nan lah tibo

4/3 Aggun Binai

Mandolah mandeh kanduang ambo Duo jo mamak kanduang diri Kalau baitu baritonnyo Sugiro ambo malah pai Barundianglah mande tangah rumah Ambo kabalakang hanyo lai

4/2 Kambang Suaso

Ampunkan ambo kakak kanduang Kayu gadang ditangah koto Ka-ambo bukak raik takanduang Danga dek tuan baritonnyo Samaso dalam basikola Anak rang ranah koto tuo Samo saujuik sapangana Sampai kini baitu juo Anak angku malin batuah Bagala sutan nagari Janji arek karanglah sudah Indak dapek inyo mungkiri Anak surang mandeh barampek Dikoto tuo suku piliang Cari dek tuan sampai dapek Baitu anggun mangko sanang

4/3 Datuk Rajo Mudo

diak kanduang intan saruan Mandeh kanduang anggun bainai Jikok baitu baritonnyo Lah jalek tarampak kaditanai Jikok mbo danga ujuang curito Lah jaleh labuah kadituruik Cupak tatagak kadisi Limbago lah nyato kadituang Tapi samantang nan baitu Imbau dek adiak anggun bainai Adoh sabuah pasan ambo

4/3 Kambang Suaso

Kalau baitu nan kaelok Mananti tuan sakutiko Mbo imbau anggun kabalakang Nak kanduang gnan rancak Pamenan koroang jo kampuang Anak kamari malah tagak Nyato diimbau mamak kanduang
ANGGUN BAINAI DATIANG MEMENUHI PANGGILAN MANDEHNYA YANG SEDANG BARBINCANG-BINCANG DENGAN MAMAKNYA, SEMENTARA KAMBANG SUASO PERGI KEDAPUR MENGGANTIKAN PEKERJAAN ANGGUN BAINAI

4/3 Datuk Rajo Mudo

Oo gadih anggun bainai Anak tungga dek mandehnyo Samantaro upiak kadapuo Lah mamak danga baritonnyo Pihak nan dari mandeh upiak Tapi samantang nan baitu Dek mamak adoh nan taraso Pihak kapado diri upiak Adaik di dalam barumah tango

Legaran 5

KEJADIAN BERLANGSUNG DIRUMAH GADANG KAUM PALIMO KAYO, LEMBANG ALAM MENEMUI MAMAKNYA UNTUK MEMPERTANYAKAN TENTANG JANJI MAMAKNYA YANG BELUM TUNTAS, TENTANG PERJODOHANNYA DENGAN ANGGUN BAINAI.

5/1 Sutan Lembang Alam

Ampunkan denai mamak kanduang Ayah gadih anggun bainai Apo ko sabab mamak bamanuang Adoh ko kusuik nan tak salasai Lah lamo bana mamak tak pulang Denai mancinto mamak juo Elok lah mamak bari tarang Apo ko sabab karanonyo Dek denai lai nan takana Rundiangan mamak nan daulu Nan mamak sabuik-sabuik juo Jikok tagantuang sabeto tali Nan tarandam sasayak aia Kini dimano talataknyo Eloklah mamak bari tarang Buliah nak sanang dalam hati Sajuak didalam kiro-kiro

5/1 Datuk Palimo Kayo

Lembang alam mudo nan jombang Nan capek kaki ringan tangan Iyo lah lamo mamak tak pulang Banyak sansaro ditanggungkan Lah patuik mamak bari tarang Danga dek mudo baritonyo Ujan labek dapek balinduang Ujan paneh apo kadayo Aluran diri anggun bainai Inyo basutan dimatonnyo Inyo barajo dihati nyo Bautak kapangka langan Babana ka ampu kaki Guno jo iko inyo baleh Dunia akiraik den tak suko Putuih tak dapek kadijeleh Mudo jan berang pado ambo

5/2 Sutan Lembang Alam

Mamak kanduang dek badan denai Dek tiliak pandangan ambo Gajah tadorong gadiang patah Rimau talompek baling tinggi Simpai putuih ambalau tangga Puntiang patah basi tabuang Tajam tak baguno lai Sayang ka-anak balabihan Santun taruwah tak bahinggo Aluran badan diri mamak Iyo bana bak kato urang Kaluak paku kacang balimbiang Timpuruang lenggang-lenggangkan Baok manurun kasaruasuo Tanamlah kacang jo ureknyo Anak dipangku kamanakan dibimbiang Urang kampuang dipatenggangkan Tenggang nagari jan binaso Tanggang sarato jo ubeknyo Nan diwakatui ko kini Dek mamak tak tapakai lai Tagah dek langkah laku mamak Dek pi’i anggun bainai Denai mandapek malu gadang Arang dikaniang lah tacoreang Malu kamano disuruakkan Malang bana denai bamamak Urang bamamak lai mambimbiang Denai bamamak mahinoan Jikok sarupo iko bana Tampan kamanakan rencoang aceh Nak sanang bana hati mamak

5/3 Datuk Palimo Kayo

Ooo buyuang lembang alam Dayo setan usah ditompang Asuang ililiah usah dituruik Kabacakak mudo jo angan-angan Kabagaluik mudo jo untuang Tak mungkin dek kiro-kiro Tak masuak di aka budi Kini baitu hanyo lai Alam leba nagari lapang Bungo kambang tak satangkai Kumbang tabang tak saikua Cari dek buyuang nan katuju Piliah dek buyuang nan dihati Kok tak sampai jo ameh perak Nak tan deh sawah jo lading Bia lah mamak nan mananggung Alah kasanang hati buyuang

5/2 Sutan Lembang Alam

Mamak denai palimo kayo Aiang sakik lain nan baubek Baganggang ubek jo panawa Pihak kabadan diri denai Sabalun mati sutan nagari Binaso tubuah anggun bainai Darahden tasirok juo Dima lurah pasawangan Dima kelok nan baliku Gajah gadiangnyo kaden patah Rimau kuliknyo ka den bukak Baitu bana hati den sanang
Luko sasiuk tak mangalua Barang tairih nak tadagiang Babaju kuniang colok gambia Maunyi rumah tak badapua Takanak kabek nan limo Den tompang kapa tak batekek Badan maunyi pulau tingga Denai nan indak manyasa lai Tingga lah mamak tangah rumah Denai mancari sutan nagari

5/3 Datuk Palimo Kayo

Mano ang buyuang lembang alam Salah dek waang badan mamak Dek cinto den bakeh waang Bia bacarai jo anak bini Guno jo iko waang baleh Tapi samantang nan baitu Nan tagarih kok tapaek Nan tagamba koko tak sudah Itu pantangan rang diminaang Limbak nan dari pado itu Nan tagarih kao lah tapaek Nan tagamba kao lah sudah Turuik denai kasarasah barangin Tantang aia babelok mudiak Tantang baringin rimbun daun Dibaliak lurah batu gadang Batuluk punggung malah kini Denai bajalan hanyo lai

Legaran 6

KEJADIAN DIGELANGGANG TEMPAT KERAMAIAN ANAK MUDA-MUDA MENGADU NASIB DENGAN BERMACAM-MACAM KEGIATAN, SUTAN LEMBANG ALAM DATANG KETEMPAT ITU UNTUK MENCARI KAWAN- KAWANNYA, PANDAKA SATI, PANYARIANG AWAN, DAN RAJO BATUANG

6/1 Pandeka Sati

Taaa… adendeng bagala pandeka sati Nan kuek batulang tongga Kok tacancang kurlai jo kundi Tak gamang malopek paga

6/1 Panyariang Awan

Panyariang awan lubuk sariak Bagala rajo diateh Nyarang kukuk-ang kaden cakiak Ranggah pia-ang kaden laleh

6/1 Rajo Batuang

Aden bagala rajo batuang Nan tingga diparak buluah Asa lai galeh-den kabaruntuang Jo rang gaek ang kaden kicuah
PANDEKA SATI, PANYARIANG AWAN, DAN RAJO BATUANG SEDANG ASIK MEMBICARAKAN MERIAHNYA PESTA PERNIKAHAN ANGGUN BAINAI DENGAN SUTAN NAGARI, DAN BAGAIMANA NASIB LEMBANG ALAM SETELAH MENGETAHUI KEJADIAN TERSEBUT. PADA SAAT ITULAH SUTAN LAMBANG ALAM DATANG.

6/1 Sutan Lembang Alam

Manolah tuan pandeka sati Rajo batuang panyariang awan Sajak tadi aden mancari Bari maaf jaweklah tangan Ooo tuan pandeka sati Sajak pagi galanggang lah rami Tapatan anak mudo matah Rapek bahimpun kasadonnyo Tuan batigo nan tabilang Tuan juaro nan tak tampak Heranlah denai mamandangi Jaweklah kato gak sapatah Buliah nak sanang dalam hati Sajuak didalam kiro-kiro

6/2 Pandeka Sati

Manolah sutan lembang alam Urang nan cari lapiak cando kio Jikok baitu nan mudo tanyokan Danga dek mudo baritonnyo Aluran badan diri kami Ukua jangkko kutiko dahulu Jangko mambantangkan lapiak Karumah tanggo anggun bainai Iyo bana bak kato urang Lah hilang rono dek panyakik Lah hilang baso dek nan tidak Sakutiko karang mananggo Maujuang pulau kami dahulu Lah lamo kito tak basuo Mudo baa panangguangan

6/2 Sutan Lembang Alam

Manolah tuan pandeka sati Urang nan ari lapiak budiman Malang bana untuang den kini Nyato diarak dek bagian Lah patuik denai bari tarang Danga dek tuan baritonnyo Dek nasib denai nan malang Nyato buruk nan tapinto
Dek pandeka cubolah pikie Lah tigo tahun sampai kini Dek mamak palimo kayo Duo jo ayah kanduang denai Denai nyo ambiak kaminatu Iyo jo gadih anggun bainai Urang lah maso itu Disinan badan mangko sansai Aluran diri anggun bainai Kok tagak nyato bapaliang Kok dudua nyato bakisa Kawin jo kawan kito bana Iyo jo sutan nagari Sumarak kampuang rang pialing Alah kajaleh tu dek tuan

6/2 Pandeka Panyariang Awan

Manolah mudo lembang alam Jikok manuruik pandapek denai Kutiko limo nan lah mukia Galah salapan nan lah duto Aluran diri sutan nagari Nan indak mamakai raso-raso Tunuak luruih kalengkiang kaiek Muluik manih hati busuak Panuhuak kawan sairang Panahan jarek dipintu Pangguntiang dalam lipatan Pamapeh ikan dalam balango Pantangan rang minang nan nyo buek Dek kito indak tapakai

6/2 Pandeka Rajo Batuang

Manolah mudo lembang alam Jikok manuruik pandapek denai Danga dek buyuang den katokan Kok takuik dilamun pasang Usah barumah ditapi pantai Hiduik nan usah mangupalang Tak kayo barani pakai Nak duo kato sairiang Danga dek mudo sabuok lai Kok tak dihulu mato aia Nyato dilurah rang bandakan Kok tak lalu dandang di aia Ditangah gurun kito rangkakkan Alah kajaleh tu dek mudo

6/2 Pandeka Sati

Manolah mudo lembang alam Urang nan geneang digalanggang Jikok manuruik pandapek denai Danga dek mudo mbo katokan Pandanglah ikan dalam lawik Siang malam dilamun ombak Dilengah sisik jo radai Nan tak manapahu ujuang pulau
Sajak dibungo baikara Tibo diputiak lah bajanji Jatuah kabuah lah mandamai Asam diarek gadang naik Ikan dalawik lah mati Dalam balango basuonyo Lembang alam urang nan geneang Urang nan geneang dinagari Dalam medan pamaianan
Jikok bakawan samo gadang Ibaraik kito balamari Kunci nan usah dibarikan Diri nan usah dibanggakan Nan batin usah dikatokan Nak duo kato sairiang Jikok mbo caliak mudo kini Lah banyak sobaik nan mangicuah Sungguah bana picayo jaanss Jaweklah kato jo mupakai Mupakaik jatuang jo hati Dilahia ambo baibaraik Dibatin cubo lah pahami

6/3 Sutan Lembang Alam

Maolah tuan pandeka sati Panyariang awan rajo batuang Pihak kabadan diriden kini Salangkah turun dari janjang Pantang den babaliak pulang
Sabalun mati sutan nagari Binaso tubuh anggun bainai Darah den tasirok juo Dima lurah pasawangan Dima kelok nan baliku Gajah gadiangnyo kaden patah Rimau kuliknyo kaden bukak
Baitu bana hatiden sanang Alah kajaleh tu dek tuan Kini baitu hanyo lai Bari maaf jaweklah tangan Tinggalah tuan katigonyo Kok lai elok untuang jo bagian Barisuak kito basuo Denai bajalan hanyo lai

Legaran 7

KEJADIAN DIRUMAH ANGGUN BAINAI, SETELAH PERNIKAHANNYA DENGAN SUTAN NAGARI IA TERINGAT AKAN AYAHNYA YANG SUDAH LAMA MENINGGALKAN RUMAHNYA

7/1 Sutan Nagari

Anggun Bainai runggo hati pamenan hati nan jo jantuang lawik tanang riaklah sunyi doa dipati tuan malin asok mambubuang kaudaro sialah urang jo kamaurak antah kok Allah jo Muhammad kok indak kito nan baduo
dia kanduang pamenan mato bak duri dalam dagiang bak tulang rangkuangan kini taraso-raso juo pihak kapado ayah kito lah lamo baliau tak dirumah kabanyo adoh dipaladangan elok kito silau baliau kamudiak antah kok sakik ngilu pamiang sakik sialah nan kamaubek pamiang sialah nan kamancaliak baa timbangan hati adiak

7/1 Anggun Bainai

tuan kanduang sutan nagari jikok baitu kato tuan samo saniak malah kito tapi samantangpun nan baitu dek ambo adoh nan marusuah ambo mandapek kaba saiah pihak kadiri si lembang alam manaruah dandom dalam hati lah banyak kato nan talompek lah banyak muluik nan tadoroang
sabalun mati badan tuan binaso tubuh badan ambo darahnyo katasirok jao

7/2 Sutan Nagari

Diak kanduang anggun bainai Kok hanyo sutan lembang alam Adiak nan usah cameh bana Sabab baa dek baitu
Masin garamnyo lah den cubo Padeh ladonyo lah den makan Hari guruah tak kaujan Harimau mangauang tak mancakcau
Kini baitu hanyo lah dek adiak Sadiokan haka kito bajalan Sabalun hari tinggi bana Kito bajalan hanyo lai

Posting Komentar